《魚缸博客》香港魚缸同內地魚缸最唔同嘅地方其中之一係，股價無升跌停機制。所以，啲
股票，特別係細價股，鍾意升幾多就升幾多，鍾意跌幾多就跌幾多，完全無王管。
話說今日魚缸都出左一隻倍升股，執筆時卓航控股（０１８６５）做緊０﹒０４６蚊，即係
４仙６。博客一時眼花，差啲以為係做化妝品零售果間。股價今日爆升一倍，仲要無任何公布，
例如涉及收購、私有化或發盈喜之類嘅利好消息，唔係一般上市股份可以做得到。
翻查卓航嘅過去，雖然上市短短５年，但原來呢啲大升大跌嘅場面一早已經見慣不怪。
２０２２年４月２７日，卓航股價大跌９０％。４月２８日股價反彈７２％，然後４月２９日再
升６１％。之後喺２０２３年９月１３日，股價又大跌８０％。只可惜，呢次大跌之後，並無好
似２０２２年咁大反彈。
卓航控股係新加坡管道建設同相關工程服務嘅總承辦商，客戶主要包括私營燃氣、水務、電
訊、供電公司。公司喺２０１９年上市，上市價５毫半子。因為主力做管道工程，所以上市時，
公司名叫管道工程，俾人一種踏踏實實嘅感覺。一?個名，就知道佢哋做乜嘢生意。２０２１年
６月公司將「管道工程」更改為「卓航控股」。就咁?個名，博客除咗第一眼睇錯，以為係賣化
妝品零售果間之外，真係想像唔到佢地靠咩揾食。
睇返卓航過去５年嘅股價走勢，最風光時刻係２０２０年９月１７日，股價最高去到
１﹒８３蚊，之後走勢向下。近期一直挨住低位２仙幾。今日大升，有錢賺嘅話，俾博客一定食
胡先，呢種千載難逢嘅機會真係可一不可再。不過，又有幾多人係低位揸貨？如果手頭無貨嘅，
博客真係唔敢建議買，博客唔係「搏客」，唔會揾命搏。（ｖｓ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
